|
Kiteak Him Durgam?
George Pinto
Konknni lokancho itihas panch hozar vorsam purvilo mhunnon ami horddem
boddoitat. Khorench obhimanachi gozal! Punn aiz amche mukhar vosta to prosn
mhollear, titlo itihas axil'le ami aiz kiteak vingodd vingodd chure? Ami
hennem-tennem ximpddon geleat - Goem, Ratnagiri, Karwar, Mongllur, Kochin,
oxe amche vantte asat. Hindu Konknnim ani kristanv Konknnim, Goenkar Konknni
ani Mongllurkar Konknnim.
Hea modem taripechi songoth mhollear, Mongllurkar hindu Konknneank Goenkar hindu Konknneanchi bhas somzonk tras zatat tor Mongllurkar kristanv
Konknneank Goenkar kristanv Konknno kitem sangta tem somzona. Khoinchei lokam modem bhas ekvott haddtta tor Konknni lokam modem, bhaxenuch
amkam pois keleat, oxem bhogta. Mongllurant G.S.B., kristanva lagim Konknni uloita tor, apli bolin uloina. Vepara logtin, kristanvanche bolin uloita.Toxem kristanv Konknneak G.S.B. bolichi vollokuch
zaina.
Goenkar, Mongllurkar ken'na ektthaim melltat ten'na te Inglix vo Hindin uloitat. Kiteak, Goenkar Mongllurkarachea utrak chiddaita tor Mongllurkar
Goenkaranchea. Ani hem chukonvche khatir te veglle bhaxecho adhar ghetat. Aiz-kalchi poristhiti polletana oxem bhogta ki ami ek zavpachem hea ekvisvea
xekddeant legun xokea na. Ganva bhair, mhollear Mumbaiani Golfant zaite Konknni sonstha asat. Punn Mongllurkaranche vingodd ani Goenkaranche
vingodd. Oxem kiteak? Eke podot'tin chintpeamni tori ektthaim mellon fokot KONKNNI sonstha ubi korunk zaina? Sodeak vostelea Konknni sonsthamni mhunnon
heram sonsthank aplea kariamni misoll korunk zaina? Edoll kitem tori he dixttin proitn chol'leat zalear Mongllurant MANDD SOBHANN sonstheche ani
Mumbaint GRAF sonstheche. Hea donui sonsthamni apli nodor fokt aple somudaiek matr dhorinastana her bolichea lokank aplea kariokramamni misoll
korche proitn keleat, ani korit asat. Punn itlench khonddith zavn pavona. Konknniche sorv fuddareamni he dixen kariaghot zaunk zai ani apli nodor
vixall korunk zai.
Goem Konknnichem kullar mhonnttat Mongllurant, punn hem utramni matr. Amche vagnnuken ami portekuch urleanv. Dhuve ghorak ani kullarak kitench sompork
na mhollear chuk zanvchina. Fattlea disamni, Mongllura modem ani Goeam modem ek sankov bandcho proitn chol'la. Punn tea vorvim sud'da kitench zalem
na.
Sobhek hajir zatoleamni ap-aple veoktik ud'dex gheun hajir zanvchem ani sogleamni eke samaneo vedik (common platform) ieunk zaina zanvchem, oxem
zaun, Sobhe voir Sobha xivai amchea vividh Konknni somudhaiam modem aslelim durgam moddun uddovpache koslech karea hea sobhamni zal'le disonant.
Rostear cholpi sadea Goenkara modem ani Mongllurkara mnodem eka-meka vixim kitem chintop asa tem sodun kaddlear, amkam kitench sontosachem mellona.
Haka kitem karonn tem Devuch zanna. Mongllurkarak pollelear Goenkarak pottona, ani Goenkara lagim Mongllurkarak sarkem poddona. Oxem
kiteak?
Oi, amchi bhas ekuch, amcho dhorm ekuch punn khoim tori amchi sonskruti poisovlea. Goenkaranchi sonskruti soglich paschmi zalea tor, Mongllurkar
apli sonskruti teach paschimi sthorar haddunk boballta. Dogainki apli dhorinchi, aple matiechi, aplea purvozanchi sonskruti naka zalea.
Goenkaranche sonskrutichem paschyathikoronn zaun tinxim vorsam utortat tor, Mongllurkaranchi sonskruti paschyathikoronn zaunk laglear pon'nas vorsam
zatat (pon'nas vorsam adim porian aplech sonskrutichi thoddi savlli punn asli ti atam disona). Ani zaum ieta he udexim vorsam sortat toxim amkam
porkich keleat.
Sadar kolent (performing arts) tori Goenkaramni, Mongllurkarank khub fattim uddoileat, oxem dista. (Hea vidanak lagon khub Mongllurkar mhojer
ragoutole!). Goeant Hidvam modem vo kristanvam modem zaum sadar kola bhov fuddem pavon, tika borich xist ailea. Punn Mongllurant azun pondra
drisheache, ponchvis vorsam adim boroilelim nattkam sador zatat. Hi sthiti boldonk zai tor ami amchem ghomondd vo orthik
faido polloun bosonk zaina.
Goenchea pongddamni, Mongllurant niranthor dakhovnneo dileat tor matr, lok thoim zagoun ieunchi xokea
asa.
Hea modem sompork madheom - lipiche khub tras astat. Romint jem kitem asa tem Kan'nadd ani Devanagri toxem Malayalam lipicheank mellona. Kan'naddint
axil'lem herank mellona. Jedna Vixv Konknni Som'melon zalem, tedna Konknniche ekikoronna vixim aikonk tori mellttalem. Punn kall gelo toxem,
hacher visor poddon, sogle ap-aple volibhitor ghusleat. Tor kedna zatolem lipichem ekikoronn ani kedna sogle Konknni bhav-bhoinni, zat-kat, dhorm ani
her songthi pois korun ek zatole?
Kedna amche modle he dore tutton poddttele?
|
